نئی دہلی، 23/ستمبر (ایس او نیوز /ایجنسی) لوک سبھا میں حزب اختلاف کے قائد راہل گاندھی مسلسل ریزرویشن کے مسئلے پر آواز بلند کر رہے ہیں، اور بی جے پی کی جانب سے ان کے بیانات کو توڑ مروڑ کر پیش کرنے پر شدید تنقید کر رہے ہیں۔ حال ہی میں انہوں نے سوشل میڈیا پلیٹ فارم 'ایکس' پر ایک بار پھر ریزرویشن کے حوالے سے اپنا مؤقف واضح کیا ہے۔ راہل گاندھی نے کہا کہ "بی جے پی کی بہوجن مخالف سازشیں اور جھوٹ چاہے جتنے بھی ہوں، ہم ریزرویشن کے حقوق پر کوئی آنچ نہیں آنے دیں گے۔"

’ایکس‘ پر کیے گئے اپنے تازہ پوسٹ میں راہل گاندھی لکھتے ہیں کہ ’’ہم تب تک نہیں رکیں گے جب تک ایک وسیع ذات پر مبنی مردم شماری نہ ہو جائے، ریزرویشن پر سے 50 فیصد کی حد ہٹا کر ہر طبقہ کو ان کا حق، حصہ داری اور انصاف نہ مل جائے، مردم شماری سے حاصل جانکاری مستقبل کی پالیسیوں کی بنیاد نہ بن جائیں۔‘‘

وزیر اعظم نریندر مودی پر حملہ آور رخ اختیار کرتے ہوئے راہل گاندھی کا کہنا ہے کہ ’’مودی جی ’ذات پر مبنی مردم شماری‘ بولنے تک سے ڈرتے ہیں۔ وہ نہیں چاہتے ہیں کہ بہوجنوں کو ان کا حق ملے۔ میں پھر سے دہراتا ہوں، میرے لیے یہ کوئی سیاسی ایشو نہیں ہے، بہوجنوں کو انصاف دلانا ہی میری زندگی کا مشن ہے۔‘‘